Sawpakonnet ... !

Si zot lé kontinié li sa man ka ékri, alé wè anlè sawpakonnet.wordpress.com.

Mwen té lé testé sèvis blog tala… Mwen wè, mwen dékouvè é mwen kostaté ki i ni an lo bagay ki pa o pwen épi-y. Mé pas man pran gou a sa mwen ka fè-a an lè blog Sawpakonnet, mwen ké gadé-y. Mwen ka déménajé-y. Al`sé pou sa mwen ka di “mwen té la”. E mwen chapé épi tout sa mwen ja ékri.

Dépi ou ni an tèt diféran pas chivé-w natirel yo ka di ou rasta. Avan mwen pa té ni loks, chivé mwen té rèd ek grennen. Sa té délè trè difisil pou mwen té démélé yo.http://sawpakonnet.unblog.fr/files/2010/11/dscn2490.jpg Pou métrizé yo, mwen té ka maré yo épi an foular. Yo té ka kriyé mwen rasta… Bizarman, atjelman mwen ni loks,http://sawpakonnet.unblog.fr/files/2010/11/dsc00657.jpg pèsonn pa ka mandé mwen si mwen rasta ou ben kriyé mwen sistè. Es padavwa an lo fanm -ek nonm tou - ka pòté loks. Si sé sa, sa vé di ki ni an chanjman trè rapid andan mantalité nou. Sé an bon bagay mé sa ka fè mwen pè tou. Mi sé konsa nou ka pran osi tou sa ka vini lot koté-a san menm nou pran tan réfléchi anlè-i.

Bon siklonn Toma pasé. I soukwé dé twa pié bwa payisiya. I pliché Sent Lusi. Mi la i ka pati pou dérayié Ayiti. Mi lanmisè !!! Mi fè !!! Bondié sa pa posib !… Ti péyi tala ja pwan !!! … Sa nou pé fè lè sé lè zéléman natirel. Nou ka di fò nou édé yo épi nou ka fè sa nou pé. Mé lè ou ka aprann ke koléra rivé an péyi yo pas dé moun ki té sansé édé yo vidé bak kaka yo adan an liriviè ! Sa-w ka di ? Sa ou ka fè ? Ou pa kwè ke sé manmay tala ki sòti adan péyi yo-a épi viris yo vini pou dépotjolé le pep ayisien. Sé dé bann isalop ! E mwen pa moun ka jouré. Mé man ka répété ki sé dé bann isalop. Dé séléra. Dé vermin. Pas ou vini adan péyi tala é ou sav bien ki mannyè sé moun la ka viv ou éséyé surviv. Yo ka bwè glo la riviè-a, yo ka benyen adan-i, yo ka lavé tout bagay yo adan-i. Mwen ki poko janmin alé an Ayiti mwen sav sa. Ou ki alé pou édé yo, ki ka vivi la ou pa sav sa ? Tou sa zot sonjé sé trapé lajan la minustha ka ba. Bann malonnet ! Ayiti pa té mérité sa. Ayisien pa té bizwen sa !!!

Mwen té ka chèché an fon pou prézantasion blog-la. Mwen té lé an bel bagay -sé pa fòt mwen sé kon sa mwen yé - ek mwen wè yon yo ka kriyé anturium. Bon i tibrin tro rouj ba mwen. I an janr agrésif mé y pli bel pasé anlo. Epi anturium-la sé an flè yo ka touvé lakay nou. Alow senbolikman i bon. Epi sé an mannyé pou rand omaj a flè tala pas trè souvan yo ka palé di ibiskus, mé i ni dot flè. Malérezman, anturium-la - ke nou ka kriyé arom menm si sé pa menm bagay-la, yo tout sé arom pou nou - koumansé disparet padavwa i ni an champinion ki ka ataké-i kon an lo dot bagay la kay-nou. atjelman sé sé bannannié-a… Bon mé sa sé ankoò an lot bagay ! Mwen alé !

Wè mwen désidé fè an blog pou testé unblog ek komparé-y épi sa mwen za ni. Mé mi a prézan mwen k di kò mwen ki mwen sé pé gadé épi ékri rien ki an kréyol. sa té ké an bel antrenman pou mwen. Sa nou ka di? Nou ka pran ? Bon sèl bagay mwen ja pa ni anlo tan mé de tan zan tan mwen ké éséyié. Alò mwen ka di zot : a an lot soley.

Aprè man voyajé an lè anlot éberjew pou mwen té komparé'y épi Canalblog, mi man désidé viré anlè Canalblog pas man ka touvé i pli pratik. Ki donk, tout sé mésaj la man té ja matjé anlè lot sit la, man ké impowté yo isi'ya. 

Man éséyé touvé an bagay ki té ka sanm sa man té ja ni-a mé sa pa posib alò man gadé koulè rouj-la ki ka non sèlman raplé sa man té ja ni la-a , mé ki ka ba lambians blog tala. I ké dé lè trè zinsizif é trè cho. Atann pou wè.